धौलागिरी अञ्चल यातायात व्यवसायी समितिले मुस्ताङमा सेवा विस्तार गर्ने

    केशव बि.क./मुस्ताङ साप्ताहिक
    मुस्ताङ, २६ पौष ।
        देशका विभिन्न स्थानमा यातायात सेवा संचालन गर्दै आइरहेको धौलागिरी अञ्चल यातायात बस व्यवसायी संचालक समिति बागलुङले आफ्नो सेवा मुस्ताङमा पनि विस्तार गर्ने भएको छ । समयको माग संगै यात्रुहरुको सुविधाका लागि आगामी माघ १ गते देखि मार्फा ५ पुथाङ एयरपोर्टमा काउण्टर स्थापना गरी यातायात सेवा संचालन गर्न लागेको समितिका महासचिव उमेश केसीले जानकारी दिए ।

    वि.सं. २०५५ साल देखि विधिवत रुपमा दर्ता भई छिटो छरितो भरपर्दाे सेवा उपलब्ध गराउँदै आएको समितिले जोमसोम–बागलुङ, पोखरा, काठमाण्डौँ स्तरीय एसी डिलक्स बस तथा एसी स्कारपीओ जीप मार्फत सुविधा सम्पन्न यातयात सेवा उपलब्ध गराउने जनाएको छ ।
    जोमसोम–बागलुङ बस भाडादर ८५०, जीप भाडादर १२५०, जोमसोम–पोखरा जीप भाडादर १६०० र जोमसोम–काठमाण्डौँ बस भाडादर १६५० रुपैयाँ कायम गरिने केसीले बताए । जोमसोम देखि काठमाण्डौँका लागि रात्री बस सेवा संचालन गरिने बताइएको छ ।
    मुस्ताङको यातायातमा भएको सिण्डिकेट अन्त्य भएसंगै मुस्ताङमा यातायात व्यवसायीहरुको संख्या बढन थालेपछि यात्रुहरु हर्षित भएका छन् । यसरी विभिन्न यातायात व्यवसायी समितिले मुस्ताङमा सेवा विस्तार गरिरहँदा आन्तरिक तथा बाह्य पर्यटकको संख्यामा वृद्धि हुने र यात्रुहरुले चाहेको समयमा छिटोछरितो सर्वसुलभ यातायात सेवा पाउने अनुमान गरिएको छ ।
    विगत १० वर्ष देखि मुस्ताङमा मुस्ताङ बस तथा जीप व्यवसायी समितिले एकछत्र यातायात सेवा संचालन गरेकोमा, हाल मुस्ताङमा मुक्तिनाथ दर्शन यातायात प्रालि, म्याग्दी बस तथा जीप व्यवसायी समितिले पनि यातायात सेवा संचालन गरिसकेका छन् ।        

कृषि संचार समन्वय समितिको बैठक

मुस्ताङ साप्ताहिक संवाददाता
जिल्ला कृषि विकास कार्यालय मुस्ताङको आ.व. २०७३÷७४ को स्वीकृत कार्यक्रम अनुसार जिल्ला कृषि संचार समन्वय समितिका संयोजक तथा वरिष्ठ कृषि विकास अधिकृत सावित्री बरालको संयोजकत्वमा सोमबार कृषि संचार समन्वय समितिको बैठक सम्पन्न भएको छ ।
    जिल्लास्थित संचारकर्मीहरुको उपस्थितिमा चालु आ.व. २०७३÷७४ को स्वीकृत वार्षिक कार्यक्रम अनुसार प्रथम चौमासिक अवधिमा सम्पन्न विभिन्न आयोजनाहरुको प्रगति र उपलब्धी तथा दोस्रो चौमासिक आवधिमा सम्पन्न गरिने विभिन्न आयोजनाहरुको बारेमा जानकारी गराउनेका लागि कार्यक्रमको आयोजना गरिएको हो ।
    बैठकमा प्रधानमन्त्री कृषि आधुनिकीकरण परियोजना अन्तर्गत संचालन हुने ब्लकको संसोधित क्षेत्र, विभिन्न कृषि सामाग्रीहरुको माग, साना तथा थोपा सिंचाईको माग लगायतका एजेन्डाहरुमा छलफल गरिएको थियो।
    कार्यक्रम जिल्ला कृषि विकास कार्यालयका योजना अधिकृत शिवपुजन गुप्ताको संचालनमा सम्पन्न भएको थियो ।

सीमा सुरक्षा चुस्त राख्नुपर्छः महानिरीक्षक राई

    केशव बि.क./मुस्ताङ साप्ताहिक
    मुस्ताङ, २५ पौष
सशस्त्र प्रहरी महानिरीक्षक दुर्ज कुमार राईले सीमा सुरक्षा चुस्त राख्नुपर्ने भन्दै कोरला नाका खुल्ने अवस्थामा सशस्त्र प्रहरी बल सीमा सुरक्षा गुल्मको सुरक्षा भूमिका महत्वपूर्ण रहने बताएका छन । सोमबार सशस्त्र प्रहरी बल सीमा सुरक्षा गुल्म मुस्ताङको नवनिर्मित कार्यालय भवनको समुद्घाटन गर्न मुस्ताङ आएका महानिरीक्षक राईले यस्तो बताएका हुन् ।
    सशस्त्र प्रहरी बल सीमा सुरक्षा गुल्म मुस्ताङको नवनिर्मित भवनको समुद्घाटन गर्दै राईले सीमावर्ती क्षेत्रमा शान्ति सुरक्षाको अवस्था सुनिश्चित गर्ने सशस्त्र प्रहरीको पहिलो कर्तव्य भएकाले आफ्नो कर्तव्यमा अहोरात्र खटिई समग्र शान्ती सुरक्षा, सीमा सुरक्षा, विपद् प्रकोप उद्धार लगायतका कार्यमा मन वचन र कर्मले लाग्न आग्रह गरेका छन् ।

    भारत तर्फको १८६५ किमि र चीन तर्फ १६६५ किमि सीमा क्षेत्रको सुरक्षा जिम्मा सशस्त्र प्रहरीको भएको भन्दै सीमा सुरक्षालाई चुस्त दुरुस्त राख्नुपर्ने उनको भनाई थियो ।
    तत्कालिन सशस्त्र प्रहरी नायव उपरिक्षक दिल प्रसाद भट्टको कार्यकालमा कुल लागत २ करोड ९९ लाख ४२ हजार रुपैयाँ भएको टेण्डर प्रक्रिया मार्फत गुल्मको कार्यालय भवन तथा व्यारेक भवन निर्माण कार्यको २०७१ चैत्र १० गतेवाट निर्माण कार्य प्रारम्भ भई सम्पन्न पश्चात २०७२ चैत्र १२ गते देखि नवनिर्मित भवनबाट कार्यालय संचालन हुँदै आईरहेको सशस्त्र प्रहरी नायव उपरिक्षक देवराज जोशीले जानकारी दिए ।

    २ करोड ९१ लाख ४१ हजार ९८४ रुपैयाँमा योजना स्वीकृत भएकोमा निर्माणस्थलको भुबनोट र जोखिम मुल्याङकन गरी पुनरविचार गर्दा मनोमेन्ट, गाडी गारेज र स्टोर भवनको बोलकबोल अंक भन्दा ८ लाख लागत रकम बढाई कार्यालय भवन, मुल्मपति निवास, ब्यारेक, गाडी ग्यारेज तथा स्टोर भवन निर्माण कार्य सम्पन्न भएको सप्रनाउ जोशीले बताए ।
२०७१ पौष १० गतेको जिल्ला सुरक्षा समिति मुस्ताङको निर्णयअनुसार नेपाल सरकारको नाममा रहेको जोमसोम गाविस ८ होम्दामा रहेको ६ रोपनी क्षेत्रफल भएको जग्गा गृहमन्त्रालयको पत्रबाट सहमति भए अनुसार मिति २०७१ पौष १४ देखि गुल्मको नाममा जग्गाधनी दर्ता प्रमाण पुर्जा प्राप्त भएको थियो ।

शान्ती सुरक्षा प्रतिवद्धताको आदर्श वाक्यलाई आत्मसाथ गर्दै अगाडी बढेको सशस्त्र प्रहरी संगठनलाई नेपाल सरकारद्धारा प्रदान गरिएको जिम्मेवारी पुरा गर्ने क्रममा २०६४ सालमा संविधान सभाको निर्वाचनको सुरक्षाको लागि सशस्त्र प्रहरी बल चण्डिका गणको मातहतमा अस्थाई रुपमा निर्वाचन सुरक्षा बेशको स्थापना भई मुस्ताङमा सशस्त्र प्रहरी बलको उपस्थिति भएको हो ।
उक्त निर्वाचन शान्तिपूर्ण रुपमा सम्पन्न गराई २०६५ सालमा चण्डिका गण फिर्ता भएको र २०६६ फागुन १ गते हिमाली तथा पहाडी जिल्लामा सशस्त्र प्रहरी बलको पहुँच पु¥याई सीमावर्ती जिल्लामा शान्ति सुरक्षाको अवस्था सुनिश्चित गर्ने निर्णय अनुसार मुस्ताङ जिल्लाको जोमसोममा सशस्त्र प्रहरी बल चण्डिका गणको मातहत पुन अस्थायी सुरक्षा बेशको रुपमा स्थापना भई जिविसको अतिथि गृहबाट कार्यालय संचालन गर्दै आईरहेकोमा नेपाल सरकार मन्त्री परिषदको २०७० असार ७ गतेको निर्णयले सशस्त्र प्रहरी बल सीमा सुरक्षा गुल्मको रुपमा १६० जनाको दरबन्दी स्वीकृत भएबाट विधिवत रुपमा गुल्मको स्थापना भएको थियो ।
यस गुल्मको जिम्मेवारी इलाकामा पर्ने अन्तराष्ट्रिय अर्थात चीनसंगको सीमाना सदरमुकाम जोमसोमको गुल्मबाट करिब १०५ किमि उत्तर तर्फ रहेको छ । जिम्मेवारी इलाका अन्तर्गत रहेका १८ देखि ३३ नम्वर सम्मका सीमा स्तम्भ मध्ये सानो स्तम्भ ९ वटा र मझौला स्तम्भ ७ वटा गरी जम्मा १६ वटा सीमा स्तम्भहरु रहेका छन् । र सशस्त्र प्रहरी गुल्मबाट टोली खटाई सीमा ईलाकाको समय समयमा निरीक्षण तथा अनुगमन गर्ने गरिएको सप्रनाउ जोशीले बताए ।
कोरला नाका संचालन गर्न पूर्वाधार निर्माणको लागि सशस्त्र प्रहरी सीमा सुरक्षा गुल्मलाई चीनसंगको सीमावर्ती गाविस छोसेरमा ३० रोपनी जग्गा प्राप्तिको भूमिसुधार मन्त्रालय मार्फत प्रक्रिया अगाडी बढेको र जग्गा प्राप्ति पश्चात आवश्यक पूर्वाधार निर्माण गरी सशस्त्र प्रहरीको सुरक्षा पोष्ट स्थायी रुपमा सीमा क्षेत्रमा बस्ने बताईएको छ ।
    उद्घाटन कार्यक्रममा सशस्त्र प्रहरी मुक्तिनाथ बाहिनीका बाहिनीपति नरेन्द्र कुमार सिंह, प्रमुख जिल्ला अधिकारी भीमराज पोखरेल, स्थानिय विकास अधिकारी हरिप्रसाद बास्तोला,  नेपाली सैनिक उच्च शिखर शिक्षालयका प्रमुख सेनानी इन्द्रबहादुर शाह, भीमदल गणका प्रमुख सेनानी सुरेन्द्रदेव बोगटी, प्रहरी नायव उपरिक्षक हरिहरनाथ योगी, पूर्व सभासद चन्द्र बहादुर गुरुङ, नेपाली कांग्रेसका प्रतिनिधि गणेश शेरचन, नेकपा एमालेका अध्यक्ष चन्द्रमोहन गौचन, उद्योग वाणीज्य संघका अध्यक्ष खगेन्द्र तुलाचन र नागरिक अगुवा चन्द्रबहादुर लगायत जिल्लास्थित कार्यालय प्रमुख तथा प्रतिनिधिको उपस्थिति रहेको थियो ।
सो अवसरमा सप्रनाउ देवराज जोशीले स्वागत तथा भवन निर्माण प्रतिवदन प्रस्तुत गरेका थिए । कार्यक्रम सप्रनि रामचन्द्र शर्माको संचालनमा सम्पन्न भएको थियो ।   

मुस्ताङमा आउने पर्यटक बढे

केशव बि.क./मुस्ताङ साप्ताहिक
मुस्ताङ, २४ पौष
पर्यटकीय गन्तव्यको रुपमा स्थापित हिमाली जिल्ला मुस्ताङमा भ्रमण गर्ने पर्यटकको संख्या सन् २०१५ को तुलनामा सन् २०१६ मा उल्लेख्य वृद्धि भएको छ ।   
 सन् २०१५ मा २३ हजार २७२ पर्यटकले मुस्ताङमा भ्रमण गरेकोमा सन् २०१६ मा ३९ हजार ०१७ ले भ्रमण गरेको अन्नपूर्ण संरक्षण क्षेत्र आयोजना (एक्याप) जोमसोमका प्रमुख तुलसी दाहालले जानकारी दिए । सो संख्या गत वर्षको तुलनामा १५ हजार ७४५ ले बढी हो । पर्यटकको संख्यात्मक वृद्धिसँगै मुस्ताङका होटल तथा पर्यटन व्यवसायी उत्साहित बनेका छन् ।
सन् २०१५ मा भूकम्प र नाकाबन्दीको कारण मुस्ताङमा पर्यटकको संख्यामा कमी आएकोमा २०१६ मा समय अनुकूल भएकाले पर्यटकको संख्या उल्लेख्य वृद्धि भएको दाहालले बताए । मुस्ताङमा आएका पर्यटक मध्ये १५ हजार ४७८ भारतीय र २३ हजार ५३५ अन्य देशका पर्यटक रहेका छन् ।
२०१६ को मे महिनामा सबैभन्दा धेरै ६ हजार ८१६ र सबैभन्दा थोरै जनअरी महिनामा ३६५ जना पर्यटक मुस्ताङ आएका थिए । मुक्तिनाथ मन्दिर, लोमान्थाङ दरबार, राउन्ड अन्नपूर्ण पदमार्गको थोराङला पास सहित विभिन्न हिमशृंखला र कला संस्कृतिको अध्ययनका लागि मुस्ताङमा पर्यटक आउने गरेका छन् । यसरी आउनेमा भारतीयको संख्या बढि छ ।
त्यस्तै उपल्लो मुस्ताङको भ्रमणको लागि जानेमा तेस्रो मुलुकका पर्यटकको संख्या धेरै र जसमा पनि जर्मन पर्यटकको संख्या बढि रहेको एक्यापले जनाएको छ । भूगोल र पुरातात्विक तथा ऐतिहासिक स्थलको अवलोकनका लागि पर्यटक उपल्लो मुस्ताङ जाने गरेका छन् ।
संवेदनशील क्षेत्र मानिने उपल्लो मुस्ताङ सन् १९९२ देखि पर्यटकका लागि खुल्ला गरिएको थियो । उपल्लो मुस्ताङको भ्रमणका लागि प्रत्येक पर्यटकले अध्यागमन विभागमा ५ सय डलर तिरेर पुर्जि काटनु पर्छ र भ्रमणमा कम्तिमा २ जना हुनुपर्ने प्रावधान रहेको छ । 
यस वर्ष बाह्य पर्यटकको तुलनामा आन्तरिक पर्यटकको आगमन उल्लेख्य मात्रामा भएको होटल व्यवसायीहरु बताउँछन् । सोह्रश्राद्धमा हजारौँको संख्यामा तीर्थयात्रीहरु मुस्ताङ आएका थिए । त्यस्तै घुम्न र विदा मनाउन यो वर्ष मुस्ताङ आउने आन्तरिक पर्यटकको संख्या अधिक छ । मुस्ताङको यातायातमा भएको सिण्डिकेट अन्त्य हुनुले पनि आन्तरिक पर्यटकको संख्या बढेको हो । आन्तरिक पर्यटक उल्लेख्य मात्रामा जिल्लामा भित्रिए पनि उनीहरुको रेकर्ड भने राखिदैँन् । 
अफ सिजनमा सिजनल बसाईसराईले सुनसान जस्तै हुने मुस्ताङ सिजन सुरु भएसंगै पर्यटकको आगमन पनि बढने गर्छ । पर्यटकको आगमन वृद्धि संगै यहाँ संचालित होटल, पर्यटन तथा अन्य व्यवसाय राम्रो संग फस्टाएको उद्योग वाणिज्य संघ मुस्ताङले जनाएको छ । अत्याधिक चिसो हुने भएकाले डिसेम्बर, जनअरी र फेब्रुअरी महिनालाई अफ सिजन मानिन्छ ।

मुस्ताङमा ५ गाउँपालिका

मुस्ताङ साप्ताहिक संवाददाता
मुस्ताङ, २०७३ पुस २३ । स्थानीय तह पुनर्संरचना आयोगले शुक्रवार प्रधानमन्त्रीलाई बुझाएको प्रतिवेदन अनुसार मुस्ताङ जिल्लामा ५ गाउँपालिका निश्चित भएको छ । यहाँ नगरपालिका भने छैन् । 
छोन्हुप, छोसेर र लोमान्थाङ– लोमान्थाङ गाउँपालिका, सुर्खाङ, चराङ र घमी– दालोमे गाउँपालिका, छुसाङ झोङ, मुक्तिनाथ र कागबेनी– बाह्र गाउँ मुक्तिक्षेत्र गाउँपालिका, जोमसोम, मार्फा र टुकुचेको चिमाङ गाउँ सहित– घरपझोङ गाउँपालिका र टुकुचे, कोवाङ, लेते र कुञ्जो गाविस– थासाङ गाउँपालिका हुने बताइएको छ ।
स्थानिय तह पुनर्संरचना सम्बन्धी जिल्ला स्तरीय परामर्श कार्यशाला गोष्ठीमा स्थानियले आफ्नो कलासँस्कृति टुक्रिने भन्दै आफुहरुलाई आयोगले प्रस्ताव गरेको ३ गाउँपालिका मान्य नहुने बताएका थिए । मुस्ताङलाई ३ गाउँपालिकामा विभाजन गर्ने आयोगको निर्णय अव्यवहारिक र अपर्याप्त भएको भन्दै मुस्ताङमा विशिष्टता, पहिचान, कलासंस्कृति, भौगोलिक, धार्मिक, ऐतिहासिक, विविधता, सामाजिक र साँस्कृतिक हिसाबले ५ गाउँपालिका आवश्यक रहेको भन्दै ५ गाउँ पालिका माग गरेका थिए । 
स्थानीय तह पुनर्संरचना आयोगले स्थानीय तहको संख्या र सीमा निर्धारण गरेपछि विद्यमान स्थानीय निकाय स्वतः विघटन हुने संवैधानिक व्यवस्था छ । संविधानको धारा ३०३ को उपधारा (१) अनुसार आयोगले स्थानीय तहको संख्या र सीमा निर्धारण भएपछि स्वतः स्थानीय निकाय विघटन हुनेछन् । तर, त्यसका लागि सरकारले राजपत्रमा प्रकाशित गरी आधिकारिकता भने प्रदान गर्नुपर्छ ।
आयोगको प्रतिवेदनपछि स्थानीय निकायको निर्वाचन भएमा निर्वाचित पदाधिकारी भूगोलविनाका हुनेछन् । ‘स्थानीय पुनर्संरचना आयोगले स्थानीय तहको सीमा र संख्या निर्धारण गरी प्रतिवेदन सरकारलाई बुझाएपछि सरकारले राजपत्रमा प्रकाशित गर्नुपर्ने हुन्छ र त्यसपछि स्वतः कार्यान्वयनमा जाने भएकाले स्थानीय निकाय रहँदैन । त्यस्तो अवस्थामा स्थानीय निकायको निर्वाचन भए पनि ती पदाधिकारी भूगोलविनाका हुनेछन् ।

अन्तरक्रिया कार्यक्रम सम्पन्न

मुस्ताङ साप्ताहिक संवाददाता
मस्ताङ, २३ पौष । मुस्ताङ दलित एकता संजालको आयोजनामा शुक्रवार कोवाङमा दलितको विषयमा नेपालको संविधान २०७२ मा व्यवस्था गरिएका अधिकारका बारेमा अन्तरक्रिया कार्यक्रम सम्पन्न भएको छ । दलितहरुलाई संविधानमा व्यवस्था गरिएका आफ्ना हक अधिकारको बारेमा जानकारी गराउनको लागि कार्यक्रमको अयोजना गरिएको हो ।

    कार्यक्रममा बोल्दै कोवाङ गाविसका गाविस सचिव मिलन श्रीस रानाले आफ्ना हकअधिकार प्राप्तिको लागि दलितहरु फुटेर होइन जुटेर लाग्नुपर्ने बताए ।
    त्यस्तै संजालका अध्यक्ष बुद्धिसिंह दर्जीले संविधानमा व्यवस्था गरिएका दलितका हकअधिकार कार्यान्वयनको लागि सबै मिलेर सम्बन्धीत निकायलाई घचघचाई राख्नु पर्ने बताए ।
    अन्तरक्रिया कार्यक्रमको सहजीकरण गर्दै जिल्ला अदालत मुस्ताङका वैतनिक वकिल बाबुराम अर्यालले संविधानमा व्यवस्था गरिएका दलितका अधिकारका बारेमा जानकारी गराएका थिए ।
    सो अवसरमा हिमालपारी उत्पिडित समुदाय विकास तथा शसक्तिकरण परिषदका अध्यक्ष कृष्णमोहन नेपाली, पत्रकार महासंघ मुस्ताङका संयोजक भीम रसाइलीले शुभकामना मन्तव्य व्यक्त गरेका थिए ।
कार्यक्रममा मुस्ताङ दलित एकता संजालको काम कर्तव्य र अधिकार तथा अन्तरक्रिया कार्यक्रमको बारेमा संजालकी उपाध्यक्ष सुन्देवी रसाइलीले जानकारी दिएकी थिईन् ।
मुस्ताङ दलित एकता संजालका अध्यक्ष बुद्धिसिंह दर्जीको अध्यक्षतामा भएको कार्यक्रमको संचालन संजालका महासचिव विनोद नेपालीले गरेका थिए ।      

जिल्ला प्रशासनद्धारा बजार अनुगमन

मुस्ताङ साप्ताहिक संवाददाता
मुस्ताङ, २२ पौष । जिल्ला प्रशासन कार्यालय मुस्ताङले गत बुधवार बजार अनुगमन गरेको  छ । उपभोक्ताको स्वास्थ्यलाई मध्यनजर गर्दै करको दायरामा नआएका व्यवसायीलाई करको दयरामा ल्याउनको लागि जिल्लामा सुधारात्मक अनुगमन गरिएको सहायक प्रमुख जिल्ला अधिकारी लक्ष्मण बहादुर खड्काले जानकारी दिए ।
   जिल्ला प्रशासन कार्यालय, घरेलु तथा साना उद्योग विकास समिति, कोष तथा लेखा नियन्त्रण कार्यालय र जिल्ला प्रहरी कार्यालय लगायतको सहभागितामा बजार अनुगमन गरिएको थियो । अनुगमनका क्रममा सबैमा जनचेतना बढेकाले प्यान नम्बर लिनेको संख्या बढेको पाइएको खड्काले बताए ।
    त्यस्तै अनुगमनको क्रममा सबैले दररेटमा एकरुपता ल्याएको, अखाद्य बस्तु नभेटिएको, होटलहरुको किचन सरसफाईको दृष्टिकोणले राम्रो देखिएको पाइएको थियो । केही ठाउँमा कम मात्रामा अवैध मदिरा भेटिएकाले त्यसलाई नष्ट गरिएको थियो ।
    अनुगमन गरिएको प्राय ठाउँमा मुल्य सुची टाँसेको नदेखिएकाले मुल्य सुची राख्न अनुरोध पत्र बुझाइएको खड्काले जानकारी दिए । सुधारात्मक अनुगमन मार्फत व्यवसायीलाई आफ्नो कर्तव्य बोध गराउँदै चेतनामुलक अनुगमन गरेका छौँ । यदि आगामी अनुगमनमा कसैले गैरकानुनी तबरले व्यवसाय संचालन गरेको पाईएमा कानुनी प्रक्रियामा ल्याउँछौँ । खड्काले भने ।
    सामान्यतया जिल्लाको घांसा, लेते, कोवाङ, टुकुचे लगायतको ठाउँमा अनुगमन गरिएको हो । सो अवसरमा व्यवसाय दर्ता प्रक्रिया र राजस्वको बारेमा जानकारी गराइएको थियो । यो आ.व. मा जिल्ला प्रशासनले दुई पटक बजार अनुगमन गरिसकेको छ । आगामी दिनमा पनि यसलाई निरन्तरता दिने प्रशासनले बताएको छ ।      

१३३ जना मतदाता थपिए

केशव बि.क.
मुस्ताङ २० पौष

    हिमाली जिल्ला मुस्ताङमा १३३ जना मतदाता थपिएका छन् । डेढ महिनाको अवधिमा १३३ जना मतदाता थपिएको जिल्ला निर्वाचन कार्यालयले जनाएको छ ।   

मंसिर एक गते देखि पन्ध्र गते सम्म मुस्ताङका नौँ वटा गाविसहरुमा ३८ जना महिला र ४७ जना पुरुष गरि जम्मा ८५ जना मतदाता थपिएका थिए । त्यस्तै जिल्ला प्रशासनबाट ९ जना र निर्वाचन कार्यालयबाट १ जना गरी १० जना मतदाता पनि मंसिर महिनामा थप भएको बताइएको छ ।
    हाल सम्म उपल्लो मुस्ताङमा १८ जना महिला र २० जना पुरुष गरी ३८ जना र तल्लो मुस्ताङका ९ गाविसमा ८५ जना र कार्यालयबाट १० जना गरी १३३ जना नयाँ मतदाता थपिएका छन् । उपल्लो मुस्ताङका स्थानिय जाडो समयमा देशका अन्य ठाउँमा बसाई सर्ने भएकोले पूर्ण रुपमा मतदाता संख्या संकलन गर्न नसकिएको निर्वाचन कार्यालयले बताएको छ । 
    गत कार्तिक २२ गते सम्म जिल्लामा ८ हजार ६ सय २७ जना मतदाताको संख्या रहेको थियो । नयाँ मतदाता फोटो सहितको नामावली संकलन तथा अद्यावधिक कार्यक्रमबाट १३३ जना मतदाता गरी मुस्ताङमा हाल ८ हजार ७ सय ६० मतदाता रहेको जिल्ला निर्वाचन कार्यालयको तथ्याङ्क छ ।
    स्थानिय निकायको निर्वाचनको लागि जनताको आकर्षण बढेकाले पनि नयाँ मतदाताको संख्या बढन गएको हो ।
    गत मंसिर एक गते देखि फोटो सहितको मतदाता नामावली संकलन तथा अद्यावधिक दावि विरोध समेतको अभियान संचालन गरिएको थियो ।
    नेपालको जनगणना २०६८ अनुसार जम्मा १३ हजार ४ सय ५२ जनसंख्या रहेको मुस्ताङमा हालसम्म ८ हजार ७ सय ६० जना मतदाताको नामावली संकलन हुनुले  सर्वसाधारणमा निर्वाचनको महत्वको बारेमा चेतना बढ्दै गएको देखिएको छ ।
    २१ हिमाली जिल्ला देखि सुरु भएको निर्वाचन दावी विरोध र फोटो सहितको मतदाता नामावली संकलन कार्यक्रम अहिले पहाडी जिल्लामा पनि संचालन भैसकेको छ ।

मुस्ताङमा हिमपातः जताततै सेताम्मे

केशव बि.क./मुस्ताङ साप्ताहिक
मुस्ताङ १८ पौष
हिमाली जिल्ला मुस्ताङमा आइतबार हिमपात भएको छ । वदलिँदो मौसम संगै जोमसोममा हिमपाँत हुँदा स्थानिय कृषक तथा पर्यटक हर्षित भएका छन् । मुस्ताङमा आइतबार दुई बजेदेखि हिमपात भएको हो । लगातार चार घण्टा जति हिमपात भएको थियो ।

 मुस्ताङमा जुन अनुपातमा हिउँ पर्नु पर्ने हो सो अनुपात अनुसार हिउँ नपरेपनि विगत दुई वर्षको तुलनामा यस पटक राम्रो हिउँ परेको बताइएको । हल्का फुल्का हिउँ गत हप्ता परेको भएतापनि यो हिउँद याम सुरु भएसंगै मुस्ताङको सबै क्षेत्रमा हिउँ परेको पहिलो पटक हो ।
    प्राय जसो फुर्सा रहने यहाँका डाँडाँ पाखा पखेरा पनि यति बेला सेताम्मे देखिएका छन् । मुस्ताङमा घुम्न आएका स्वदेशी तथा विदेशी पर्यटकहरु पनि हिउँ परेपछि खुःसी भएका छन् । अहिले हिउँ खेल्ने र फोटो खिच्नेहरु पनि उत्तिकै मात्रामा छन् ।
हिमपात भएपछि यहाँका कृषक हर्षित देखिएका छन् । मुस्ताङमा उत्पादन हुने कृषि उपज हिउँ संग सम्बन्धीत रहने गर्छन् । हिउँद याममा राम्रो संग हिमपात भए कृषि उत्पादन पनि राम्रो हुने यहाँका कृषकहरु बताउँछन् ।
    विगत दुई वर्षसम्म राम्रो संग हिउँ नपर्दा यहाँ उत्पादन हुने स्याउँको मात्रामा पनि कमि आएको थियो । हिउँदको समयमा राम्रो संग हिउँ परेमा स्याउको बोटमा लाग्ने किरा नियन्त्रण भई उत्पादनमा वृद्धि हुने जिल्ला कृषि विकास कार्यालय मुस्ताङले जनाएको छ ।

    हिँमपात भएपछि चिसोको मात्रा पनि ह्वात्तै बढेको छ । यहाँका स्थानिय तथा पर्यटकहरु जाडो छल्नको लागि आगो, हिटर ताप्ने गरेका छन् । जाडो समयमा यहाँ विद्युत खपतको मात्रा पनि बढने गर्छ ।