निर्वाचन तथा मतदाता शिक्षा स्वयम् सेवकहरुका लागि दुई दिने तालिम

केशव बि.क
मुस्ताङ । जिल्ला निर्वाचन कार्यालय मुस्ताङले निर्वाचन तथा मतदाता शिक्षा स्वयम् सेवकहरुका लागि दुई दिने तालिम चैत्र २७ गते आइतवार सम्पन्न गरेको छ ।

२०७४ बैशाख ३१ गते हुने स्थानीय तह निर्वाचनको बारेमा समुदाय स्तरमा जनचेतना र सन्देश प्रवाह गराउन खटिने सामाजिक परिचालक, बालविकास केन्द्रका सहजकर्ता र स्वास्थ्य स्वयम् सेविकाहरुका लागि तालिम सम्पन्न गरेको हो ।
तालिम पश्चात नयाँ संरचना र पद्धतिमा हुन लागेको निर्वाचन धेरैका लागि कौतुहल र व्दिविधाको बिषय भएकाले नागरिकलाई प्रभावकारी हिसावले हरेक घर दैलोमा सूसुचित गर्न सहभागीलाई आग्रह गरिएको छ ।
तालिममा ३५ जनाको सहभागिता रहेको जिल्ला निर्वाचन कार्यालयका नायव सुब्बा महेन्द्र रेग्मीले जनकारी दिए । तालिम लिएपछि उनिहरुले मतदाताको घरघरमा पुगेर स्थानीय तह निर्वाचनको महत्व, मतदान गर्ने तरिका, मतदाताको भुमिका, आचार संहिता, मतपत्र बदर हुन नदिन अपनाउनुपर्ने साबधानीको विषयमा जानकारी गराएको जिल्ला निर्वाचन अधिकारी सिताराम शर्मा लामिछानेले बताए ।
तालिमको सहजिकरण जिल्ला निर्वाचन अधिकारी लामिछाने, देवी गिरी, महेश थकाली, जिल्ला निर्वाचन कार्यालयका नायव सुब्बा महेन्द्र रेग्मी र कम्प्युटर अपरेटर छेत्रदास बैरागीले गरेका थिए ।
मुस्ताङमा ३७ वटा मतदान स्थल कायम गरिएको छ । १ मतदान क्षेत्रमा १ जना मतदाता शिक्षा स्वंयमसेवक खटाइनेछ । मुस्ताङमा ५ वटा गाउँपालिका छन् । जसमा २५ वटा वडा छन् । ८ हजार २ सय ६३ मतदाता रहेका छन् । 
जिल्लामा स्थानीय तहको चुनावका लागि जिल्ला निर्वाचन कार्यालयमा ६ दल दर्ता छन् । कार्यालयका अनुसार नेकपा एमाले, जनसमाजवादी नेकपा माले, नयाँ शक्ति पार्टी नेपाल, नेकपा माओवादी केन्द्र, नेपाली कांग्रेस, राष्ट्रिय प्रजातन्त्र पार्टी र नेपाल पूर्व राष्ट्रसेवक लोकतान्त्रिक पार्टी दर्ता छन् ।