मस्ताङ, २३ पौष । मुस्ताङ दलित एकता संजालको आयोजनामा शुक्रवार कोवाङमा दलितको विषयमा नेपालको संविधान २०७२ मा व्यवस्था गरिएका अधिकारका बारेमा अन्तरक्रिया कार्यक्रम सम्पन्न भएको छ । दलितहरुलाई संविधानमा व्यवस्था गरिएका आफ्ना हक अधिकारको बारेमा जानकारी गराउनको लागि कार्यक्रमको अयोजना गरिएको हो ।
त्यस्तै संजालका अध्यक्ष बुद्धिसिंह दर्जीले संविधानमा व्यवस्था गरिएका दलितका हकअधिकार कार्यान्वयनको लागि सबै मिलेर सम्बन्धीत निकायलाई घचघचाई राख्नु पर्ने बताए ।
अन्तरक्रिया कार्यक्रमको सहजीकरण गर्दै जिल्ला अदालत मुस्ताङका वैतनिक वकिल बाबुराम अर्यालले संविधानमा व्यवस्था गरिएका दलितका अधिकारका बारेमा जानकारी गराएका थिए ।
सो अवसरमा हिमालपारी उत्पिडित समुदाय विकास तथा शसक्तिकरण परिषदका अध्यक्ष कृष्णमोहन नेपाली, पत्रकार महासंघ मुस्ताङका संयोजक भीम रसाइलीले शुभकामना मन्तव्य व्यक्त गरेका थिए ।
कार्यक्रममा मुस्ताङ दलित एकता संजालको काम कर्तव्य र अधिकार तथा अन्तरक्रिया कार्यक्रमको बारेमा संजालकी उपाध्यक्ष सुन्देवी रसाइलीले जानकारी दिएकी थिईन् ।
मुस्ताङ दलित एकता संजालका अध्यक्ष बुद्धिसिंह दर्जीको अध्यक्षतामा भएको कार्यक्रमको संचालन संजालका महासचिव विनोद नेपालीले गरेका थिए ।
No comments:
Post a Comment