जिल्ला अस्पताल मुस्ताङमा स्वास्थ्य उपकरण थप !

केशव विश्वकर्मा
मुस्ताङ, १३ श्रावण
हिमालपारीको जिल्ला मुस्ताङमा संचालित एकमात्र अस्पताल मुस्ताङ जिल्ला अस्पतालमा विभिन्न स्वास्थ्य उपकरण थप गरिएको छ ।

विरामीहरुको छिटोछरितो, सहज र भरपर्दाे उपचारका लागि विभिन्न नयाँ उपकरणहरु थपिएको अस्पताल श्रोतले बताएको छ ।
जिल्ला स्वास्थ्य कार्यालय मुस्ताङले केन्द्रवाट स्विकृत लिएर १८ वर्ष पुरानो एक्सरे मेसिन हटाएर अस्पताल सुदृढिकरणको लागि २ लाख ९८ हजारको सेमी डिजिटल मेसिन थप गरेको जिल्ला स्वास्थ्य प्रमुख शम्भु ज्ञवालीले जानकारी दिए ।
त्यसैगरी अस्पतालमा स्वास्थ्य सेवा विभागबाट माग गरी २ वटा आधुनिक डेलिभरी बेड र ५ लाख बराबरको रेडियन्ट वार्मर पनि ल्याइएको छ ।

एक्सरे मेशिन जडान गर्दै प्राविधिक

मुस्ताङ हिमाली जिल्ला भएकाले चीसो बढि हुने र बच्चा जन्मदा वित्तिकै अथवा जन्मेको २८ दिन भित्र चिसोका कारण शिताङ्ग (कठ्याङग्रीएर) भएर मर्ने हुँदा बच्चाको शरिरलाई आवश्यक पर्ने तापक्रम सो मेसिन द्धारा उपलब्ध गराई बालमृत्युदर कम गर्नको लागि मेसिन ल्याइएको स्वास्थ्य प्रमुख ज्ञवालीले बताए ।
त्यस्तै स्वास्थ्य विमाग बाटै माग गरी ल्यावमा रगत तथा इन्जाइम टेष्टहरुलाई यकुरेट (निश्चित) गर्न १ लाख ८० हजार मुल्य बराबरको आधुनिक किसिमको एनालाईजर मेशिन पनि ल्याएको अस्पताल श्रोतले जनाएको छ ।

डिजिटल डेलिभरि बेड

अस्पतालमा विरामीलाई छिटो छरितो सेवा उपलब्ध गराउन विपतका बेला विरामीको संख्यामा वृद्धि भएमा आकस्मिक उपचारको लागि तुरुन्तै सेट गर्न सकिने १० वटा फोल्डिङ वेडको व्यवस्था गरिएको बताइएको छ ।
स्वास्थ्य प्रमुख ज्ञवालीका अनुसार हिमाली जिल्लामा अक्सिजनको कमी हुने भएकाले सिकिस्त विरामीलाई उपचार गर्नको लागि डिजिटल अक्सिजन कन्सनटेटर मेशन ल्याइएको, अक्सिजनको लेवल नाप्ने मिटर, ग्लुको मिटर लगायतका विभिन्न उपरकरण अस्पातालमा उपलब्ध गराइएको छ ।

ल्याव

विरामीको सहज पहुँच र अस्पताल व्यवस्थापनको लागि सोधपुछ कक्ष, औषधी वितरण कक्ष र नागरिक वडापत्रको उचित व्यवस्थापन गरेका छौँ । स्वास्थ्य प्रमुख ज्ञवालीले भने ।
दुईजना डाक्टरको दरबन्दी रहेको जिल्ला अस्पतालमा हाल ५ जना डाक्टर कार्यरत छन् । माग अनुसार नेपाल सरकारको छात्रवृत्ति कोटाबाट २ वर्षको लागि डाक्टरहरु आउने गरेको स्वास्थ्य प्रमुख ज्ञवालीको भनाई छ ।
भौगोलिक विकटता भएको मुस्ताङमा संचालित जिल्ला अस्पतालमा दैनिक करिब ४० जना विरामीले सेवा लिने गरेका छन् ।