बालबालिकाले गरेका गल्ती कसुर नभई बिज्याँई हुनेः जिल्ला न्यायधीस शर्मा !

मुस्ताङ साप्ताहिक
संवाददाता
बालबालिकाको सर्वाेत्तम हित र कल्याणको लागि बालबालिका अनुकूलको न्याय हुनुपर्नेमा एक कार्यक्रमका सहभागिले जोड दिएका छन् । जिल्ला बाल समन्वय समिति मुस्ताङको आयोजनामा गत सोमवार पुथाङ एरपोर्टमा मुस्ताङ भएको नेपालको बाल न्याय प्रणाली र सरोकारवाला निकायहरुको भूमिका विषयक एक दिवसिय अनुभव आदानप्रदान तथा अन्तरक्रिया कार्यक्रमका सहभागिले सो कुरामा जोड दिएका हुन् ।
कार्यक्रममा बोल्दै जिल्ला न्यायधीश पिताम्बर शर्माले बालबालिकाले गरेका गल्ती कसुर नभई बिज्याँई हुने भएकाले बालबालिकालाई बाल न्याय अनुकुलको फैसला हुने कानुनी व्यवस्था रहेको बताए । न्यायधीश शर्माले १६ वर्ष मुनिका बालबालिकाले कुनै अपराध नभई बाल बिज्याँई गर्ने भएकाले उनीहरुलाई कारागार नभई अभिभावक तथा बालसुधार गृहमा लैजानुपर्ने उल्लेख गरे ।
बालबालिका सम्बन्धी ऐन २०४८ ले १० वर्ष भन्दा मुनिका बालबालिकाले कुनै बिज्याई गरेमा आम माफी दिने व्यवस्था गरेको न्यायधीश शर्माको भनाई छ ।
त्यसैगरी प्रमुख जिल्ला अधिकारी गणेश बहादुर अधिकारीले बालबालिकाको हितमा सबैले आआफ्नो पक्षबाट योगदान पु¥याउनुपर्ने भन्दै बालबालिकाको अधिकारको लागि आफुले सक्दो प्रयत्न गर्ने प्रतिवद्धता व्यक्त गरे ।
नेपालको बाल न्याय प्रणालीः अवधारणा र नेपालको बाल न्याय प्रणाली सम्बन्धी राष्ट्रिय तथा अन्तराष्ट्रिय कानुनी व्यवस्थाको विषयमा जिल्ला न्यायधीश पिताम्बर शर्मा, कसुरको अभियोग लागेका बालबालिकाः बालमैत्री अनुसन्धान तथा अभियोजनमा प्रहरी तथा सरकारी वकिलको भूमिका र अभ्यास (अनुसन्धान तथा अभियोजन सम्बन्धी विषयवस्तुहरु) विषयमा प्रहरी नायव उपरिक्षक हरिहरनाथ योगी र जिल्ला न्यायधीवक्ता रुद्र गौतम र कानुनको विवादमा परेका वा कसुरको अभियोग लागेका तथा अपराधबाट पिडित बालबालिकाहरुका लागि बालमैत्री सेवा (कानुनी सहायता, मनोविमर्श सेवा, सामाजिक अध्ययन प्रतिवेदनको तयारी, सिफारिस सेवा, उमेर परिक्षण आदि) का लागि सरोकारवालाहरु बिच समन्वय र सहकार्यः सम्भावना र चुनौतिहरुको विषयमा जिल्ला बालकल्याण समितिको तर्फबाट महिला विकास अधिकृत सावित्रा शाहले सहजीकरण गरेका थिए ।
कार्यक्रममा जिल्ला शिक्षा अधिकारी केशरीरमण न्यौपाने, पिएन क्याम्पस पोखराका पूर्व प्राचार्य डा. डिल बहादुर क्षेत्री र जोमसोमका गाउँ मुखिया चन्द्र बहादुर थकालीले मन्तव्य व्यक्त गरेका थिए ।
जिल्ला बाल न्याय समन्वय समितिका अध्यक्ष तथा जिल्ला न्यायधीश पिताम्बर शर्माको अध्यक्षता, बैतनिक अधिवक्ता बाबुराम अर्यालको स्वागत तथा जिल्ला अदालतका नायव सुब्बा शालिकराम न्यौपानेको संचालनमा सम्पन्न भएको कार्यक्रममा जिल्लास्थित सम्पूर्ण सरोकारवालाहरुको उल्लेख्य उपस्थिति रहेको थियो ।