छुसाङमा दुर्लभ हिउँ चितुवा भेटियो !

 मुस्ताङ साप्ताहिक संवाददाता
हिमालपारीको जिल्ला मुस्ताङको छुसाङमा दुर्लभ मनिने हिउँ चितुवा घाईते अवस्थामा भेटिएको छ । छुसाङ गाउँ नजिकै लडेको घाईते अवस्थामा चितुवा भेटिएको हो ।

तस्वीरः निरज थकाली

श्रावण ३ गते स्थानिय पानी लिन छुसाङ गाउँ भन्दा केही माथि जाने क्रममा हिउँ चितुवालाई देखेपछि प्रहरीलाई खबर गरेका थिए ।
अन्दाजी २ वर्षको सो हिउँ चितुवा दुवै खुट्टा भाँचिएको घाईते अवस्थामा रहेको प्रहरीले जानकारी दिएको छ ।
उक्त चितुवालाई जलवायु परिवर्तन सम्बन्धि अनुसन्धान गर्ने क्रममा छुसाङ पुगेको वनस्पति, पशुपन्छिमा विज्ञ टोली, राष्ट्रिय प्रकृति संरक्षण कोष (NTNC) र अन्नपूर्ण संरक्षण क्षेत्र आयोजनाको सहयोगमा करिब साँझ ४ बजे काठको बाकसमा हालि नियन्त्रणमा लिएको प्रहरीले जनाएको छ ।
सो घाईते चितुवालाई जोमसोममा ल्याई उपचार गरी पुन लेकमा छोडिने अन्नपूर्ण संरक्षण क्षेत्र आयोजना (एक्याप) इलाका कार्यालय जोमसोमकी प्रमुख निरु थापाले बताईन् ।
एक्याप प्रमुख थापाका अनुसार सो हिउँ चितुवाको उपचारका लागि काठमाण्डौँ बाट पशु चिकित्सक र प्राविधिकहरुको टोली भोली जोमसोम आउँदै छ ।
हिउँ चितुवाको संरक्षण तथा उपचारका लागि एक्याप र प्रहरीको टोलीले चितुवालाई आज साँझ जोमसोम ल्याएको छ ।

मुस्ताङमा विश्वमा दुर्लभ मानिने हिउँ चितुवा १७ वटाको संख्यामा रहेको एक्यापको तथ्याङ्कमा उल्लेख छ ।  
त्यसैगरी गत वर्ष असारमा मुक्तिनाथ गाविस वडा नं.१ लुप्रा गाउँको चरन क्षेत्रमा भेडा च्याङग्राको बथानमा कस्तुरी मृग भेटिएको थियो ।

अन्दाजी एक महिनाको सो कस्तुरी जंगलमा छोड्दा एक्लै बाँच्न नसक्ने भएकाले स्याहार सुसार तथा संरक्षणको निम्ति जोमसोम देखि राष्ट्रिय प्रकृति संरक्षण कोष अन्तर्गत सदर चिडियाखाना जावलाखेल ललितपुर पठाइएको थियो ।