केशव बि.क./मुस्ताङ साप्ताहिक
मुस्ताङ ७ पौष
प्रधानमन्त्री कृषि आधुनिकिकरण परियोजना जिल्ला स्तरीय अभिमुखिकरण गोष्ठी बिहिवार जिविस सभाहल जोमसोममा सम्पन्न भएको छ । प्रधानमन्त्री कृषि आनुनिकिकरण परियोजनाको बारेमा जानकारी गराउँनको लागि जिल्ला कृषि विकास कार्यालय मुस्ताङले गोष्ठीको अयोजना गरेको हो ।
समग्र कृषि मुल्य श्रृङखलाका अवयवहरुको एकीकृत संयोजन र परिचालन मार्फत खाद्य पोषण सुरक्षा सुनिश्चित गर्दै कृषि औद्योगिकरण उन्मुख दिगो आर्थिक अवसरहरु सृजना गरि राष्ट्रको समग्र विकासमा टेवा पु¥याउने परियोजनाको लक्ष्य रहेको बताईएको छ ।
२०७३ श्रावण देखि २०८२ असार सम्मको अवधि भएको परियोजनाको परियोजना अवधिभरको कुल अनुमानित लागत १ खर्ब ३० अर्ब ७४ करोड २० लाख रुपैयाँ रहेको र आ.व. २०७३÷७४ को बिनियोजित बजेट ५ अर्ब ७८ करोड ६२ लाख ७५ हजार रुपैयाँ रहेको वरिष्ठ कृषि विकास अधिकृत सावित्री बरालले जानकारी दिईन् ।
परियोजनालाई पकेट, ब्लक, जोन र सुपर जोनको रुपमा अगाडी बढाइनेछ । जस अन्तर्गत १० हेक्टरको पकेटहरु, १०० हेक्टरको ब्लकहरु, ५०० हेक्टरको जोनहरु र १००० हेक्टरको सुपरजोनहरु रहने बरालले बताईन् । यसरी पकेट, ब्लक, जोनको क्षेत्र तोकिदाँ मुस्ताङमा एकै गाउँमा जग्गा उपलब्ध नहुने भएकाले जग्गाको समस्या हुने देखिएको छ । हिमाली जिल्लामा परियोजनाको कार्यविधि अनुसार काम गर्न समस्या हुने भएकाले कार्यविधि संशोधन गर्न स्थानियले माग गरेका छन् ।
आ.व. २०७३÷७४ मा मुस्ताङमा स्याउ, आलु लगायत गरी ५ पकेट संख्याको रुपमा परियोजना संचालन हुने र यस आ.व.मा मुस्ताङको लागि १ करोड ५० लाख बजेट रहेको जिल्ला कृषि विकास कार्यालयले जनाएको छ ।
अभिमुखिकरण गोष्ठीमा बोल्दै प्रमुख जिल्ला अधिकारी भिमराज पोखरेलले राष्ट्रलाई कृषिमा आत्मनिर्भर बनाउँदै रोजगारीका अवसरहरु सृजना गराउने यस परियोजनाको फाईदा लिन सबैलाई आग्रह गरे । त्यस्तै निमित्त स्थानिय विकास अधिकारी गोविन्द सिग्देलले परियोजनाले कृषि क्षेत्रको विकास र विस्तार गरी आय, क्षमता र निर्यात वृद्धि गर्न महत्वपूर्ण भूमिका खेल्ने भएकाले यसमा सबै लाग्नुपर्ने बताए ।
निमित्त स्थानिय विकास अधिकारी सिग्देलको अध्यक्षतमा भएको कार्यक्रमको संचालन जिल्ला कृषि विकास कार्यालयका शिवपुजन गुप्ताले गरेका थिए । कार्यक्रमको सहजीकरण वरिष्ठ कृषि विकास अधिकृत सावित्री बरालले गरेकी थिईन् ।
No comments:
Post a Comment